Lögregla óttast stríð Vítisengla og Útlaga

Lögregla óttast nú að það stefni hraðbyri í átök eða uppgjör hér á landi á milli áhangendaklúbba tveggja stærstu vélhjólagengja veraldar, Hells Angels og Outlaws. Þetta er ein meginástæða þess að nú er í smíðum í innanríkisráðuneytinu frumvarp til laga sem veita á lögreglunni víðtækari heimildir til að rannsaka skipulagða glæpastarfsemi. Ögmundur Jónasson innanríkisráðherra vill efla lögregluna til að taka á starfsemi glæpahópanna.

Klúbbarnir tveir eru MC Iceland og MC Black Pistons. Síðarnefndu samtökin eru tiltölulega ný af nálinni hér á landi og voru stofnuð til höfuðs MC Iceland. MC Iceland hafa verið starfrækt hér lengi, fyrst undir merkjum Fáfnis. Þau hafa sótt um aðild að Hells Angels, eða Vítisenglum, sem starfrækt eru víða um heim. Allt þykir benda til þess að þau verði fullgildir meðlimir innan tíðar. MC Black Pistons eru hins vegar stuðningssamtök bifhjólasamtakanna Outlaws, sem starfa einnig í mörgum löndum og hafa lengi tekist á við Hells Angels um yfirráð á sviðum skipulagðrar glæpastarfsemi.

Stofnun MC Black Pistons hér á landi er runnin frá Noregi. Á síðasta ári varð Jón Trausti Lúthersson fullgildur meðlimur í MC Black Pistons þar ytra. Hann hafði skömmu áður hrökklast úr formannsembætti í Fáfni.

Samkvæmt heimildum Fréttablaðsins stóð hann að stofnun Black Pistons hér á landi, en fer þó ekki með stjórn klúbbsins enda búsettur í Noregi. Ögmundur Jónasson innanríkisráðherra ræddi skipulagða glæpastarfsemi á Alþingi í gær.

Hann sagði allt benda til að hún færðist óðum í vöxt. „Hér erum við að tala um fíkniefnasölu, mansal, peningaþvætti, vopnasmygl, vopnasölu og fjárkúgun af grófustu grófustu sort," sagði Ögmundur. „Öðru hvoru fáum við innsýn í þennan ljóta heim í gegnum fjölmiðla og er ég sannfærður um að við sem hér tökum til máls tölum fyrir hönd Íslendinga almennt um að þetta er samfélag sem við ekki viljum og ætlum ekki að líða."