Bubbi: Ég er eins og ungbarn sem skoppast í kringum hana

„Hún er alveg að blómstra maður," svarar Bubbi Morthens sem á von á öðru barni um miðjan ágúst með eiginkonu sinni Hrafnhildi Hafsteinsdóttur en saman eiga þau tveggja ára dóttur, Dögun París, þegar við spyrjum hann hvernig konan hans hafi það.

Hvað áttu mörg börn? „Sex börn. Þetta er sko ríkidæmi og öll heilbrigð og ekkert þeirra búið að feta í fótspor pabba í óreglunni," svarar hann ánægður.

Áttu það til að fitna með henniyfir meðgönguna eins og sumir karlmenn? „Nei... ja á seinustu meðgöngu þá var ég ekkert að hreyfa mig og þá var ég hvort sem er feitur fyrir en við erum bæði mjög aktív núna í líkamsrækt og mataræði. Hún æfir á hverjum einasta degi og ég æfi sex daga vikunnar, tvo klukkutíma í senn. Ég boxa og ég er að lyfta og hjóla. Við erum mjög aktív."

Var þetta fyrirfram ákveðið að eignast annað barn? „Ó já," svarar hann.

En hvenær kemur nýja platan þín út? „Nýja platan kemur út 6. júní sennilega á afmælisdaginn minn þannig að það er sitt lítið af hverju í farvatninu en börnin eru auðvitað það sem skiptir máli en fyrir utan það þá halda þau mér ungum og að ekki sé talað um þegar maður er með svona stórkostlegri gyðju eins og Hrafnhildi. Ég er eins og ungbarn sem skoppast í kringum hana," segir Bubbi.

„Dóttir okkar varð tveggja ára núna um daginn þannig að þú sérð að ég er enn í bleyjuskiptum," segir Bubbi og bætir við:  „Þetta eru stærstu gjafir lífs míns."

- elly@365.is