Sprengiefnið fundið - góðkunningi lögreglu í varðhaldi

Sprengiefnið, sem var stolið úr tveimur rammgerðum gámum í Þormóðsdal ofan við Hafravatn á dögunum, fannst við húsleit í Hafnarfirði og Kópavogi seint í gærkvöld. Í tilkynningu frá lögreglu segir að karl um þrítugt, sem á langan afbrotaferil að baki, hafi verið handtekinn í þágu rannsóknarinnar.

„Lögreglan telur sig hafa endurheimt allt sprengiefnið sem stolið var og hefur því verið komið fyrir á öruggum stað en meðferð þess er stórhættuleg þeim sem ekki kunna með það að fara," segir ennfremur. „Lögreglan framkvæmdi nokkrar húsleitir í leitinni að sprengiefninu en við aðgerðirnar naut hún aðstoðar sérsveitar ríkislögreglustjóra."