Margir sækja símenntun á Íslandi

Ísland er í þriðja sæti 33 Evrópuþjóða þegar litið er á þátttöku 25-64 ára í símenntun, með 25,2% þátttöku. Aðeins í Danmörku og Sviss er þátttakan meiri en á Íslandi. Meðaltal Evrópusambandslandanna 27 er 9,1%. Þátttaka í símenntun í Evrópu er meiri í norðvestur Evrópu en minni sunnar og austar í álfunni.

Ríflega 70 þúsund manns á aldrinum 16-74 ára, eða rösklega 30% þjóðarinnar, sóttu sér einhvers konar fræðslu í fyrra. Þá er átt við annað hvort í skóla eða aðra fræðslu með leiðbeinanda. Frá árinu 2003 hefur hlutfall landsmanna á þessum aldri, sem stundar einhvers konar menntun, farið heldur hækkandi. Hlutfallið var rúm 28% árið 2003 en fór hæst í 33,1% árið 2006.

Sé aðeins miðað við aldurinn 25-64 ára, sem er virkasti hópurinn á vinnumarkaði, sækir um fjórðungur landsmanna sér fræðslu, tæplega 41 þúsund manns. Konur sækja sér frekar menntun en karlar, samkvæmt tölum Hagstofunnar.