Kókaínmál á Selfossi: Allir lausir úr haldi - úrskurðaðir í farbann

Héraðsdómur Suðurlands féllst ekki á kröfu lögreglunnar á Selfossi á laugardaginn um að þrír Litháar myndu sæta áframhaldandi gæsluvarðhaldi eftir að um 400 grömm af kókaíni fundust í fórum þeirra í sumarbústað í Árnessýslu fyrir um ellefu dögum síðan. 

Héraðsdómur hafði áður úrskurðað mennina í vikulangt gæsluvarðhald og einn í viðbót í tíu daga gæsluvarðhald. Mennirnir eru því lausir úr haldi en eru þó í farbanni.

Ólafur Helgi Kjartansson, sýslumaður á Selfossi, segir rannsóknina ganga ágætlega miðað við aðstæður en í samtali við fréttastofu í morgun vildi hann ekki tjá sig um ákvörðun héraðsdóms.