Yfirgnæfandi líkur á að Vaðlaheiðargöng spjari sig vel

Steingrímur J. Sigfússon fjármálaráðherra segir yfirgnæfandi líkur á að Vaðlaheiðargöng muni standa undir sér, og gott betur en það. Þingmenn, sem hlýddu á, eru ekki allir sannfærðir.

Örlög Vaðlaheiðarganga eru nú í höndum Alþingis sem þarf á næstu vikum að ákveða hvort ríkissjóði verður heimilað að lána hlutafélagi þá fjármuni sem þarf. Umhverfis- og samgöngunefnd þingsins hóf að kryfja málið í morgun, fékk fyrst til sín Ögmund Jónasson innanríkisráðherra, sem sagði grundvallarforsendu að veggjöld stæðu undir kostnaði. Fulltrúar Vaðlaheiðarganga hf. sögðu nýja útreikninga sýna að með innan við þúsund króna veggjaldi myndu göngin greiðast upp á 25 til 30 árum.

Ekki eru allir sannfærðir. Þannig staðhæfði Þór Saari, þingmaður Hreyfingarinnar, að það væri greinilegt að fjármögnun gengi ekki upp sem sjálfbær. Það væri útilokað mál og það þyrfti ekki að hafa mörg orð um það.

Mörður Árnason, þingmaður Samfylkingarinnar, sagðist efast um að Alþingi ætti að samþykkja þá tillögu sem sett hefði verið fram í fjárlagafrumvarpinu um ábyrgð á láni eða endurlán. Þingmennirnir Árni Johnsen og Þuríður Backmann lýstu hins vegar yfir stuðningi við málið og Róbert Marshall var jákvæður.

Fjármálaráðherrann Steingrímur J. Sigfússon sagði ráðuneyti sitt telja að göngin ættu að geta staðið undir sér. Forsendur væru eins traustar og þær gætu orðið.

,,Ég tel alveg yfirgnæfandi líkur á því að þetta verkefni muni ganga vel og sjá um sig sjálft. Og ég er reyndar mjög bjartsýnn á að það muni gera betur en það. Ég er eiginlega alveg viss um að óvissuþættirnir eru miklu líklegri til að falla á jákvæðu hliðina í þessu núna heldur en þá neikvæðu."

Þá væru líklegar stórframkvæmdir ekki teknar með í reikninginn.

,,Daginn sem til dæmis komnar eru ákvarðanir um að fara í virkjanaframkvæmdirnar í Suður-Þingeyjarsýslu þá held ég að menn þurfi ekki að hafa meiri áhyggjur af þessu máli. Það mun spjara sig og spjara sig vel," sagði Steingrímur.