Vilja þingvíti á Steingrím fyrir mútubrigsl

Dómur Hæstaréttar í máli umhverfisráðherra og Flóahrepps var það fyrsta sem þingmenn hófu að ræða í dag að loknu tíu daga fundahléi. Framsóknarmaðurinn Sigurður Ingi Jóhannsson sagði að þegar stjórnlagaþingið hafi verið til umræðu hefðu ráðherrar forsætis og innanríkis sagt að þeir þyrftu ekki að segja af sér, enda hefðu þeir engin lög brotið.

"Hér hefur verið lögbrot. Og kemur ekki einu sinni afsökunarbeiðni. Hvað þá, - sem eðlilegast væri, - að umhverfisráðherra segði af sér," sagði Sigurður Ingi.

"Umhverfisráðherra nýtur fyllsta stuðnings og trausts míns," sagði Steingrímur og kvaðst fagna því að loksins væri kominn umhverfisráðherra sem gerði það sem góðir umhverfisráðherrar ættu að gera; að standa vörð um náttúruna.

En það voru þó ekki þessi ummæli Steingríms sem kölluðu á hörðustu viðbrögðin, heldu þessi:

"Áfram stendur það álitamál hvort menn vilji hafa fyrirkomulagið þannig að utanaðkomandi aðilar geti keypt sér niðurstöður í skipulagsmálum, sem ég held að þingmenn ættu að taka alvarlegar en hitt."

Bæði formaður og þingflokksformaður Framsóknarflokksins sögðu að með þessum orðum hefði fjármálaráðherra vænt Landsvirkjun um að greiða mútur og Flóahrepp að þiggja mútur og kröfðu þingforseta um að ávíta fjármálaráðherra. Þingflokksformaður Sjálfstæðisflokks, Ragnheiður Elín Árnadóttir, krafðist þess að Steingrímur bæðist afsökunar á orðum sínum.

"Þetta eru ein þau ósmekklegustu orð sem hér hafa fallið, - og er þó af nógu af taka," sagði Ragnheiður Elín.

Gunnar Bragi Sveinsson, þingflokksformaður Framsóknarflokks, spurði um nýja Ísland:

"Hvað hefur breyst á Íslandi? Hvar er nýja Ísland sem hæstvirtur fjármálaráðherra, eins og margir aðrir, tala um, þegar kemur að því að axla ábyrgð. Hér er ráðherra dæmdur af Hæstarétti fyrir að brjóta lög. Og það er bara pólitík, segir hún!"