Friðrik undir leikstjórn föður síns á ný

„Þetta er smá góðgerðarstarfsemi,“ segir Friðrik Steinn Friðriksson, sonur leikstjórans Friðriks Þórs Friðrikssonar.

Friðrik Steinn fer með hlutverk í þáttunum Tími nornarinnar, sem eru byggðir á samnefndri bók Árna Þórarinssonar. Friðrik Þór leikstýrir þáttunum og tökum er að ljúka um þessar mundir, en þeir verða sýndir í Sjónvarpinu um páskana.

Friðrik Steinn hefur áður leikið undir stjórn föður síns, en hann fór með hlutverk í Englum alheimsins, Djöflaeyjunni, Á köldum klaka, Bíódögum og Skyttunum. Það eru því liðin um tíu ár síðan Friðrik lék síðast í mynd föður síns.

Hvernig er að vera byrjaður að leika á ný?

„Það er fínt.“

Ferðu með stórt hlutverk í Tíma nornarinnar?

„Nei, ekki beint. Það er mystískt, getum við sagt.“

Friðrik Steinn er að vinna að útskriftarverkefni sínu í vöruhönnun í Listaháskóla Íslands. Hann segir leiklistina vera fína aukavinnu. „Svona „on the side“ eins og maður segir,“ segir hann og játar að hann myndi allavega íhuga frekari störf í leiklistarbransanum. „Þetta er fínt með. Það er fínt að vera að gera eitthvað annað og getað hlaupið í þetta.“

Friðrik hefur nánast aðeins leikið undir stjórn föður síns. Fyrir nokkrum árum fór hann þó með hlutverk í mynd manns sem er þekktur fyrir uppistand frekar en leikstjórn í dag. „Það var Ari Eldjárn,“ segir Friðrik. „Ég lék í stuttmynd eftir hann fyrir svona átta árum.“ - afb