Bjarni Ben hjá Audda Blö: Við erum ekki ósátt

„Já, við höfum alltaf verið ágætir vinir," segir Bjarni Benediktsson, formaður Sjálfstæðisflokksins, um tengsl sín og Hönnu Birnu Kristjánsdóttur borgarfulltrúa sem tilkynnti um formannsframboð sitt í síðustu viku.

Þetta kom fram í útvarpsþættinum 95BLÖ hjá Audda og Sveppa í gær. Þar var Bjarni spurður nokkra spurninga en það er óhætt að segja að viðtalið hafi verið heldur óformlegt því strákarnir öskruðu á Bjarna þegar þeir spurðu hann nokkra spurninga. Þeir kalla liðinn í þættinum „Hitaklefinn."

Í viðtalinu sagði Bjarni meðal annars að hann og Hanna Birna væru ekki ósátt. Hann var spurður að því hvort að Hanna Birna væri að grafa undan honum. „Nei nei, við erum bara að framkvæma lýðræði í flokknum," svaraði hann. Þá tók hann einnig fram, aðspurður, að enginn klofningur væri í Sjálfstæðisflokknum.

Þá kemur einnig fram að Bjarni hafi fengið sér djús í hádeginu og fari í klippingu hjá hárskeranum Baldri. Auðunn spurði Bjarna hvort að „útrásargosarnir" hafi fengið allt afskrifað: „Nei, ég held að þeir hafi meira og minna tapað öllu sínu."

Hann var einnig spurður að því hvers vegna fólkið í landinu fengi ekki að eiga kvóta. „Fólkið í landinu nýtur góðs af útgerðinni," sagði hann tók fram að það nyti góðs af því í gegnum skatta og veiðigjaldið. Þá tók hann fram að skattar í landinu þyrftu að lækka.

Hægt er að hlusta á „viðtalið" við Bjarna með því að smella á hlekkinn hér að ofan.