„Gósenland fyrir tilraunarstarfsemi og nýja flokka"

Nær fimmtungur kjósenda myndi skila auðu eða sleppa því að fara á kjörstað færu kosningar fram til alþingis í dag og fjórtán prósent taka ekki afstöðu eða neita að gefa hana upp. „Gósenland fyrir tilraunarstarfsemi og nýja flokka," segir stjórnmálafræðingur.

Þetta kemur fram í nýjum þjóðarpúlsi Gallup sem fréttastofa Ríkisútvarpsins birti í gærkvöldi.

Birgir Guðmundsson stjórnmálafræðingur við Háskólann á Akureyri segir þetta sýna að enn sé mikil óvissa í stjórnmálunum og flokkarnir séu enn að glíma við það vantraust sem hefur verið ríkjandi. Einnig kemur fram í þjóðarpúlsinum að rúm fimm prósent svarenda myndu kjósa aðra flokka.

„Ég held að það hafi legið fyrir í allan vetur, þetta er staðan í stjórnmálum, það er gósenland fyrir tilraunarstarfsemi og nýja flokka. Við heyrðum um áramótin að Besti flokkurinn væri tilbúinn að fara fram á landsvísu, það eru margir flokkar í burðarliðunum. Ef þetta heldur áfram svona eru töluverðar líkur á nýjum framboðum."

Samkvæmt þjóðarpúlsinum nýtur Ríkisstjórnin stuðnings 37% landsmanna sem er örlítið meira en mældist í nóvember. Birgir segir að það sé slæmt fyrir ríkisstjórnina að hafa ekki meiri stuðning en það sé einnig áhyggjuefni fyrir stjórnarandstöðuna að vera ekki að græða þegar stuðningurinn er ekki meiri.