Tveir bréfberar bitnir til viðbótar í Mosfellsbæ

Tveir bréfberar voru bitnir þegar þeir voru að bera út póstinn í Mosfellsbæ í dag. Þetta er í annað sinn á skömmum tíma sem slíkt gerist í bænum en á dögunum var bréfberi bitinn af hundi. Hún stórslasaðist þegar hún datt við árásina og braut á sér fótinn en ekki er ljóst hvort bréfberarnir sem bitnir voru í dag séu illa sárir.

Í tilkynningu frá Íslandspósti segir að því miður gerist það nokkuð oft að bréfberum sé ógnað við störf sín af hundum. „Hundar eru lausir við heimili sín, bundnir beint við útidyrahurðir þar sem póstkassar eða póstlúgur eru eða eru beint innan við hurðir og glefsa í póstinn þegar bréfberar setja hann inn um lúguna," segir ennfremur.

Íslandspóstur vill því beina þeim tilmælum til hundaeigenda að þeirra viðrögð verði þau að halda hundum sínum innandyra á þeim tíma sem von er á bréfbera. „Ekki er hægt að ætlast til þess að bréfberar fari inn í garða eða að húsum þar sem hundar eru lausir eða bundnir við útidyrahurðir. Þetta er sérstaklega mikilvægt nú þegar mikið af sumarfólki er að koma í vinnu. Í þeim tilfellum þar sem ekki er hægt að bera út vegna hunda á lóðinni er póstur viðkomandi heimilis komið á næsta pósthús þar sem hægt er að nálgast hann. Góð leið til að losna við slík óþægindi er að staðsetja póstkassa sína við lóðamörk."

Fyrirtækið stendur í þessari viku fyrir námskeiðum fyrir bréfbera á höfuðborgarsvæðinu um hvernig best sé að bregðast við ógnun hunda. „Slík námskeið hafa verið haldin oft áður og reynst vel og hafa þá bréfberar getað nýtt sér það sem þeir læra á þessum námskeiðum í samskiptum sínum við hunda. Að þessu sinni þá er það Guðrún Hafberg stýrir námskeiðinu, en hún er hundaþjálfari og einnig bréfberi hjá fyrirtækinu."

„Frá sjónarmiði Íslandspósts snúast hlutirnir fyrst og fremst um að geta veitt bréfberum öruggt starfsumhverfi. Áfram verður haldið vinnu við að reyna að fá í gegn einhver úrræði svo að bréfberar geti stundað vinnu sína á öruggan hátt en Íslandspóstur hefur unnið í því að fá heimild frá Póst- og fjarskiptastofnun fyrir því að geta krafist þess af hundaeigendum að þeir setji póstkassa sína út að lóðamörkum. En þá væri hægt að koma í veg fyrir mörg slys af þessu tagi."

Mynd í viðhengi: Guðrún Hafberg, bréfberi og hundaþjálfari ásamt hundinum sínum Slæðu