Flestar íslenskar konur í háskólanámi á Norðurlöndunum

Á Norðurlöndunum velja fleiri konur en karlar háskólanám. Á Íslandi er hlutfall þeirra þó áberandi hæst eða um 66 af hundraði. Svíar eru í öðru sæti en þar er hlutfall kvenna með háskólamenntun 63,4%. Minnsti munur milli kynjanna er í Danmörku‚ þar er hlutfall kvenna 58,7% en karla 41,3%. Þetta kemur fram á vefsíðu Hagstofunnar.

Þetta og margt annað má lesa í Nordisk Statistisk Årbog 2011(Norrænu hagtöluárbókinni) sem kemur út í dag 16. nóvember. Þar kemur einnig fram að:

Rúmlega 4.000 vegalaus börn komu til Norðurlanda á árinu 2010. Langflest þeirra voru á aldrinum 15-17 ára og kom stærsti hópurinn til Svíþjóðar. Þó hefur dregið verulega úr fjölda þeirra frá árinu 2009 þegar næstum 6.000 vegalaus börn komu til Norðurlandanna. Vegalaus börn eru einstaklingar yngri en 18 ára sem koma til landsins án fylgdar foreldra eða annarra forráðamanna. Þau börn eru einnig talin vegalaus sem skilin eru eftir ein á meðan þau dveljast í landinu.