Erfitt að skylmast við fræðslustjóra

„Það er erfitt að skylmast um tölur við fræðslustjóra eða aðra fulltrúa borgarinnar þegar þeir velja að ræða við foreldra reykvískra barna í þoku blekkingar og leyndarhjúps," segir Guðrún Valdimarsdóttir, formaður SAMFOKS, samtaka foreldra grunnskólabarna í Reykjavík.

Ragnar Þorsteinsson, fræðslustjóri í Reykjavík, segir misskilnings gæta þegar því er haldið fram að hagræða þurfi í rekstri grunnskóla Reykjavíkurborgar um 800 milljónir. Eftir að Reykjavíkurborg samþykkti 200 milljóna króna aukafjárveitingu á borgarráðsfundi í dag sé nær að tala um að niðurskurðurinn sé um 200 milljónir.

Þessu mótmælir Guðrún. „Samkvæmt orðum þeirra sjálfra hafði verið ákveðið að draga saman útgjöld á menntasviði um einn milljarð króna á árinu 2011 miðað við árið 2010. Þegar ákveðið er að slaka 200 milljónum til baka er nokkuð augljóst að eftir stendur að draga saman eigi útgjöld um 800 milljónir króna til menntasviðs borgarinnar í það heila. Þetta er á sama tíma og börnum er að fjölga á skólaskyldualdri og þegar almennar kostnaðarhækkanir hafa orðið," segir Guðrún í yfirlýsingu frá SAMFOK.

Guðrún segir að til að standa í stað hefði því ekki dugað að verja sömu upphæð til menntasviðs og áður heldur hefði þurft að bæta við til að vega upp á móti fjölgun nemenda og hækkunar verðlags. „Þrátt fyrir fullyrðingar um annað í fjölmiðlum þá hefur ekki verið horfið frá niðurskurði í grunnskólum og svo sannarlega er ekki verið að bæta í frá fyrra ári," segir Guðrún.

Guðrún segir að framundan sé eftir sem áður krafa um a.m.k. tugmilljóna niðurskurð á grunnskólana sem geti ekki brugðist við þeirri kröfu án þess að skerða þjónustu við nemendur. Hún segir að forráðamönnum borgarinnar væri sæmst að setjast nú yfir þessi mál með foreldrum og ræða málin af heiðarleika en ekki að reyna að blekkja þá með skrumskælingu á staðreyndum. Foreldrar í Reykjavík eru einnig skattgreiðendur og kjósendur í Reykjavík. Þeir vilja að þeim sé sýnd virðing og komið heiðarlega fram við þá.

SAMFOK hefur efnt til samstöðufundar í dag sem hefst á Skólavörðuhloti klukkan hálffimm.