Stallone stýrir ekki Expendables 2

Sylvester Stallone og félagar slógu í gegn með hasarmyndinni The Expendables í fyrra og framhaldsmynd er á teikniborðinu. Þær fregnir berast nú frá Hollywood að Stallone ætli sjálfum sér ekki jafn stórt hlutverk við gerð framhaldsmyndarinnar og þeirrar fyrri; hann leiti nú að öðrum leikstjóra. Ekki hefur verið gengið frá ráðningu nýs leikstjóra.

En það er ekki bara leikstjórnin sem Stallone hyggst hvíla sig á. Hann hefur eftirlátið félögum sínum, þeim David Agosto og Ken Kaufman, að sjá um handritsskrifin að mestu.

Ekkert af þessu hefur enn fengist staðfest og reyndar vilja sumir meina að enn sé möguleiki að Stallone taki að sér leikstjórnina. Sjálfur er hann að svo komnu máli ákveðinn í að einbeita sér bara að því að leika í myndinni.

Þá greinir LA Times frá því að Arnold Schwarzenegger verði í stærra hlutverki en í fyrri myndinni. Nú þegar hann hefur látið af starfi ríkisstjóra í Kaliforníu er hann sagður spenntur fyrir að rífa upp hólkinn á ný og berjast við hlið félaga sinna.