Framkvæmdastjórinn sáttur við samninginn

Tíu mánaða löngum viðræðum milli Sólheima í Grímsnesi og sveitarfélaganna á Suðurlandi lauk í fyrradag með undirritun þjónustusamnings til þriggja ára.

Samningurinn var undirritaður í húsakynnum ríkissáttasemjara. Sólheimar, sem sinna fólki með þroskahömlun, hafa verið án samnings frá því um síðustu áramót, allt frá því að sveitarfélögin tóku við málefnum fatlaðra.

Guðmundur Ármann Pétursson, framkvæmdastjóri Sólheima, sagði í samtali við fréttastofu Stöðvar 2 að ferlið hefði verið langt. „Þannig að það er þess meiri léttir að það sé búið að skrifa undir samning. Reyndar á bæði fulltrúaráð Sólheima eftir að fá samninginn til umfjöllunar og bakland Árborgar.“

Spurður hvað hafi orðið til þess að samningar náðust nú segir Guðmundur Ármann að forsvarsmenn Árborgar hafi sýnt mikil heilindi og málið hafi verið leitt vel af hendi ríkissáttasemjara. „Svo hefur líka tekið drjúgan tíma að fá gögn sem voru málinu nauðsynleg þannig að hægt væri að klára þetta. Þetta hefur jafnt og þétt verið að færast nær endamarkinu og menn náðu að setja stafina sína undir í fyrradag og það var góð tilfinning.“

Guðmundur vill ekki greina frá efni samningsins fyrr en hann fer fyrir fulltrúaráð Sólheima og stjórn þjónustusvæðis um málefni fatlaðra á Suðurlandi.

„Ég vona auðvitað að hann verði staðfestur og það verði hægt að horfa meira til framtíðar en fortíðar.“ Spurður hvort hann sé ánægður með samninginn segir Guðmundur Ármann: „Já, já. Við hefðum ekki gert þetta öðruvísi en að við værum ógurlega sáttir. Ég held að þetta sé ásættanlegt fyrir báða aðila.“ - hh