Mikill áhugi á Innihaldi

Yfir fjórtán þúsund Íslendingar hafa heimsótt nýja vefmiðilinn Innihald.is en hann fór í loftið á laugardaginn. Þær Sigrún Jóhannsdóttir, Sæunn Ingibjörg Marinósdóttir og Anna Jóna Heimisdóttir sem skipa ritstjórn miðilsins eru í skýjunum yfir viðtökunum. Innihald.is er í senn afþreyingarvefur og vettvangur málefnalegrar umræðu.

„Aðsóknin fór langt fram úr okkar björtustu vonum og við erum mjög sáttar með viðtökurnar," segir Sigrún Jóhannsdóttir lögfræðingur og einn þriggja aðstandenda nýs vefmiðils, Innihald.is.

Vefurinn fór í loftið á laugardaginn og hafa þegar um fjórtán þúsund manns skoðað vefinn oftar en einu sinni á síðustu fjórum dögum. Sem dæmi má taka er vefur Alþingis með ellefu þúsund notendur á heilli viku.

Eina af ástæðum góðrar aðsóknar á vefinn má rekja til athyglinnar sem pistill Maríu Lilju Þrastardóttur hefur vakið en hún skrifaði opið bréf til Davíðs Þórs Jónssonar. „Pistill Maríu og eftirmálar hans hafa vakið mikla athygli en við ætlum ekki að taka efnislega afstöðu í þessu máli. Okkar hlutverk er að sjá til þess að siðareglum sé fylgt en umfram það er orðið frjálst," segir Sigrún en hvetur þá sem telja að á sér hafi verið brotið að hafa samband við sérstaka siðanefnd miðilsins sem meti hvað gert verður í framhaldinu.

Þær Sigrún, Anna Jóna Heimisdóttir, stjórnmála- og kynjafræðingur, og Sæunn Marinósdóttir viðskiptafræðingur kynntust í aðdraganda Druslugöngunnar í sumar. Með nafni miðilsins vilja þær stöllur benda á að það er innihaldið sem skiptir máli en ekki útlitið. „Við vorum allar orðnar þreyttar á tilfinningarúnki margra vefmiðla og hvernig fréttaflutningi var háttað til að næla sér í sem flestar flettingar."

Innihald.is fer eftir ströngum siðareglum og hefur ritstjórnin sett saman sérstakt vefráð sem á að veita ritstjórninni aðhald og uppbyggilega gagnrýni mánaðarlega en í ráðinu er fjölbreyttur hópur einstaklinga.

„Við viljum halda ákveðnum staðli á síðunni og sjá til þess að við förum ekki út fyrir okkar eigin markmið. Við erum til dæmis strangar á að pistlahöfundar geri grein fyrir heimildum sínum, eitthvað sem ætti að vera sjálfsagt mál í vefmiðlum en er því miður ekki," segir Sigrún og hún hvetur alla til að senda inn pistla á síðuna.

Umfjöllunarefni Innihald.is er allt milli himins og jarðar eins og til dæmis þjóðfélagsmál, matargerð, listir, handavinna og kynlíf.

„Við viljum að sem flestar raddir heyrist og höfða til fjölbreytileikans en um leið uppræta fordóma. Til dæmis viljum við ekki skrifa um kynlíf með því að leiðbeina konum hvernig á að fullnægja karlmanni heldur viljum við fjalla um kynlíf á eðlilegri hátt og sem hluta af góðri heilsu."

alfrun@frettabladid.is