Tíu ára gömul og framleiðir barnaskó

Erla Guðmundsdóttir er tíu ára og æfir söng. Hana langaði mikið til að fara á Frostrósartónleika og fékk þá hugmynd að hún gæti nýtt sér hannyrðakunnáttu sína og selt afrakstur hennar til að safna sér fyrir miðanum. Úr varð að hún fór að framleiða barnaskó í alls kyns stærðum, sem eru prjónaðir í margbreytilegum litum úr ull og þæfðir.

„Ég lærði að prjóna hjá mömmu minni fyrir um ári síðan og hef gert ýmislegt, peysu handa frænku minni, trefla, húfur og fleira. Svo sá ég mömmu gera svona skó, sem hún var bara að gefa í gjafir, afmælisgjafir og slíkt, og ákvað að prófa sjálf," segir Erla en móðir hennar segir dótturina algera maskínu í prjónaskapnum.

Eftir að hugmyndin kom upp um að Erla myndi safna sér fyrir tónleikamiðanum fór hún að selja skóna á hárgreiðslustofu móður sinnar, Hársnyrtistofu Söru í Grafarvogi. Þar hafa þeir vakið mikla athygli viðskiptavina, bæði þeir sem eru úr klassískum ljósum og grátóna ullarlitum og svo litskrúðugri gerðir og framleiðslan hefur undið upp á sig.

„Þá fór frænka mín með nokkur pör í vinnuna til sín og seldi þar. Jú, mér finnst mjög gaman að gera skóna og ekki sérlega erfitt, nema kannski að gera hringina," segir Erla.

Erla prjónar yfirleitt eitthvað á hverju kvöldi en annars er mikið að gera hjá henni því auk skólans og söngsins æfir hún körfubolta. Því nýtast kvöldin ágætlega og Erla segir að yfirleitt sé kveikt á sjónvarpinu sem hún kíki þá stundum á yfir vinnunni. Hún segist hvergi nærri hætt í framleiðslunni meðan eftirspurn er fyrir hendi þótt hún nái að safna fyrir tónleikamiðanum.

juliam@frettabladid.is