Aðsóknarmet slegið í Seattle

„Aðsóknin og umfjöllunin um sýninguna er framar öllum okkar vonum. Við bjuggumst við að fá 5.000 gesti í heildina en sá fjöldi kom í fyrstu vikunni," segir Ilmur Dögg Gísladóttir hjá Norræna húsinu.

Hún vísar þar til Norræna tískutvíæringsins sem haldinn er í Seattle og sýningarinnar Looking Back to Find our Future í Norræna sögusafninu í borginni. „Sýningin er að slá öll aðsóknarmet. Fyrstu vikuna borguðu 4.626 einstaklingar sig inn á sýninguna og er það 200 prósenta fjölgun á heimsóknum í safnið vegna sýninga," upplýsir Ilmur og bætir við að sýningin hafi einnig fengið gríðarlega mikla umfjöllun bæði í Seattle og á alþjóðlegum vefum sem fjalla um listir og hönnun.

Sýningin, sem fjallar um norræna fatahönnun, er sett upp líkt og listsýning. Henni er haganlega komið fyrir í annarri sýningu í safninu sem nefnist Dream of America og fjallar um líf norrænna landnema í Seattle við upphaf 19. aldar. Norræna sögusafnið er á þremur hæðum og breiddi sýningin úr sér á allar hæðir. Á fyrstu hæð var sambræðingur fortíðar og nútíðar þar sem nútíma hönnun var blandað inn í fasta sögusýningu. Á annarri hæð voru innsetningar frá Færeyjum, Grænlandi og Íslandi og á þeirri þriðju voru Henrik Vibskov, Sandra Backlund, Ivana Helsinki, Moods of Norway og Steinunn Sigurðardóttir með innsetningar í sýningarrýmum sem eru tileinkuð Danmörku, Svíþjóð, Finnlandi, Noregi og Íslandi.

En hvernig stendur á þessum mikla áhuga á sýningunni?

„Það er ekki gott að segja. Hún var vissulega vel kynnt og haldin var ráðstefna tengd sýningunni og tveir utandagskrárviðburðir í verslunarmiðstöð og listagalleríi þannig að við náðum til breiðs hóps. Samt hefur aðsóknin komið okkur mjög á óvart," segir Ilmur.

Sýningin stendur til 14. nóvember en minni útgáfa af henni verður sett upp í Scandinavian House í New York í mars 2012. Hrafnhildur Arnardóttir mun einnig setja saman þá sýningu enda byggir hún á Seattle-sýningunni.

solveig@frettabladid.is