Tilraun sem breytti litlu

„Þetta var tilraun og hefði engu breytt. Það var verið að reyna að tryggja hagsmuni ríkisins og þessar kröfur eins og hægt var,“ segir Steingrímur J. Sigfússon fjármálaráðherra.

Í Fréttablaðinu í gær kom fram að ólíklegt þyki að Eignasafn Seðlabanka Íslands (ESÍ), sem á tæplega fimmtíu milljarða króna kröfu á hendur Sögu fjárfestingarbanka og VBS fjárfestingarbanka fái hana að fullu greidda. Eftir því sem næst verður komist gæti ESÍ í besta falli fengið tíu prósent af kröfunni til baka, um fimm milljarða af um fimmtíu.

Krafan er tilkomin eftir svokölluð ástarbréfaviðskipti fyrirtækjanna sem fólst í að þau öfluðu gömlu stóru bönkunum lausafjár úr Seðlabankanum með endurhverfum viðskiptum. Þegar bankarnir fóru í þrot stóðu Saga og VBS uppi með kröfur Seðlabankans. Kröfum þessum var breytt í lán til fyrirtækjanna. Ekki var um nýjar lánveitingar að ræða.

VBS fór í þrot ári eftir að kröfunni var breytt í lán og náði fyrirtækið aldrei að greiða fyrstu afborgun þess. Ólíklegt þykir að mikið skili sér af skuldinni til ESÍ. Líklegt þykir hins vegar að eignarhaldsfélag Sögu fjárfestingarbanka sem á að standa straum af afborgunum geti greitt allt að fjórðung af tæplega tuttugu milljarða láni. - jab