Alexander McQueen-sýning setur aðsóknarmet

Yfir hálf milljón manna hefur lagt leið sína í Metropolitan Museum of Art listasafnið í New York til að berja sýningu Alexanders McQueen augum. Sýningin er komin á toppinn yfir aðsóknarmestu tískusýningar listasafnsins og fer á topp 20 yfir aðsóknarmestu sýningar allra tíma hjá safninu.

Á sýningunni er farið yfir feril McQueen sem fatahönnuðar frá upphafi. Allt frá útskriftarlínu hans hjá Central Saint Martins skólanum í London árið 1992 til síðustu fatalínu McQueen, sem var sýnd á tískupöllunum rétt eftir dauða hans í febrúar árið 2010.

Síðustu forvöð eru að sjá sýninguna sem lýkur hinn 7. ágúst og ætlar safnið að mæta mikilli eftirspurn með því að hafa opið til miðnættis alla helgina.