Sveiflukennt sumar hjá frjókornunum

Magn frjókorna í andrúmsloftinu í Reykjavík hefur sveiflast mikið það sem af er sumri. Um tíma leit út fyrir að frjókornamagnið myndi jafnast á við metsumarið í fyrra en síðustu daga hefur það heldur minnkað.

„Síðustu daga hafa frjótölur verið nokkuð lágar ef frá er skilinn laugardagurinn þegar hvessti nokkuð. Í dag [í gær] fór svo að rigna þannig að ef veðrið helst svona næstu daga geta ofnæmissjúklingar andað léttar í bili. En svo er reyndar ástandið verra úti á landi, á Akureyri og Egilsstöðum þar sem er gott veður núna,“ segir Margrét Hallsdóttir sem sér um frjómælingar hjá Náttúrufræðistofnun.

Það eru aðallega grasfrjó sem valda fólki óþægindum á þessum tíma ársins. Birkifrjó og súrfrjó valda einnig ofnæmisviðbrögðum en þau eru mest áberandi í lok maí og júní. Kuldatíðin í upphafi sumars gerði það hins vegar að verkum að lítið var af frjóum í upphafi sumars.

„Sé sumarið í ár borið saman við sumarið í fyrra byrjuðu háar frjótölur hér töluvert seinna en í fyrra. Það hefur vafalaust verið vegna þess að það var kaldara í byrjun sumars,“ segir Margrét. Spurð um ástæður mikils magns grasfrjós um miðjan mánuðinn segir Margrét að þurrkatíð hafi haft mest um það segja. Þá hafi einnig sennilega haft áhrif að sláttur á túnum borgarinnar hefur verið stopulli en áður.

Þrátt fyrir að frjótölur hafi nú dottið niður segir Margrét þá sem glíma við frjókornaofnæmi þó ekki alveg sloppna. „Það er mjög oft toppur á þessum tíma í lok júlí ef það er þurrt. En svo kemur stundum toppur aftur í fyrstu eða annarri vikunni í ágúst,“ segir Margrét og bætir við: „Það fer í raun eftir því hvort það verður þurrt eða ekki. Verði þurrt og vindasamt má búast við miklu af frjókornum aftur.“

Til að frjókorn valdi ofnæmisviðbrögðum þurfa þau að vera til staðar í miklu magni en einnig að innihalda ofnæmisvaka sem er eggjahvítuefni sem líkami fólks með ofnæmi skynjar sem hættulegt efni, segir á vef Náttúrufræðistofnunar.

magnusl@frettabldid.is