Fyrirsætan sem sló í gegn

Með hártoppinn beinstífan upp í loftið heillaði hún áhorfendur er hún lék Mary í myndinni There"s Some-thing About Mary. Það er hin leggjalanga og ljóshærða Cameron Diaz sem leikur aðalhlutverkið í gamanmyndinni Bad Teacher en myndin var frumsýnd hér á landi í gær.

Það var í byrjun tíunda áratugarins sem Cameron Diaz var send á vegum Elite-fyrirsætuskrifstofunnar í prufur fyrir myndina The Mask. Með enga leikreynslu að baki landaði Diaz aðalkvenhlutverki myndarinnar og skaust hratt upp á stjörnuhimininn í kjölfarið.

Ferilskráin hefur lengst talsvert og inniheldur kvikmyndir á borð við My Best Friend"s Wedding, Being John Malkovich, Vanilla Sky og Gangs of New York ásamt einum af englunum þremur í Charlie"s Angels myndunum. Einnig ljáði Cameron Diaz prinsessunni Fionu, í teiknimyndunum um græna risann Shrek, rödd sína við miklar vinsældir.

Leikkonan hefur toppað lista fjölmiðla yfir fegurstu konur heims og þykir bros hennar á hvíta tjaldinu hafa mikið aðdráttarafl á áhorfendur. Flestar myndir sem hún leikur í hafa rakað inn peningaseðlum en rómantískar gamanmyndir virðast vera hennar sérflokkur.

Nýjasta mynd hennar, Bad Teacher, fellur einmitt undir þann flokk kvikmynda en þar bregður Diaz sér í hlutverk fátæks og drykkfellds kennara, Elisabeth Hasley. Henni leiðist starf sitt óskaplega og leggur sig því ekki mikið fram í vinnunni. Þess vegna einsetur hún sér að næla í forríka forfallakennarann, leikinn af Justin Timberlake, en til þess þarf hún að taka sig á í starfi. Jason Segel, sem er best þekktur úr gamanþáttaröðinni How I Met Your Mother, leikur íþróttakennara sem gerir hosur sínar grænar fyrir Elisabeth án teljandi lukku.

Ekkert lát virðist vera á vinsældum Cameron Diaz sem fagnar fertugsafmæli sínu á næsta ári. Hún er þessa dagana að taka upp myndina Gambit, sem skartar breska leikaranum Colin Firth í aðalhlutverki, en hún verður frumsýnd árið 2012. alfrun@frettabladid.is