Eurovision-ævintýrið kostar 30 milljónir

„Ferðakostnaðurinn hækkar töluvert á milli ára og stærstur hluti af því er gríðarlega hátt verð á hótelum í Düsseldorf,“ segir Sigrún Stefánsdóttir, dagskrárstjóri RÚV.

Kostnaðurinn við Eurovision-þátttöku Íslands hækkar um fimm milljónir frá því sem var fyrir ári þegar Hera Björk og Örlygur Smári kepptu fyrir Íslands hönd. Hann er núna rétt rúmar þrjátíu milljónir króna en hefur undanfarin tvö ár verið 25 milljónir. „Auðvitað erum við spæld og það eru ábyggilega fleiri lönd í sömu stöðu og við. En svona er bara lífið og svona er þessi „bisness“. Svo má ekki gleyma því að hópurinn í ár er óvenju stór.“

Sigrún segir mistökin hafa verið þau að Þjóðverjar hafi tilkynnt að keppnin yrði haldin í Düsseldorf áður en rætt hefði verið við ferðaþjónustuaðila í borginni. Þeir hefðu í kjölfar ákvörðunarinnar hækkað verðið á gistingu töluvert enda vitað að ferðamannafjöldinn myndi margfaldast með heimsókn Eurovision-fyrirbærisins. „Hóteleigendur eru að maka krókinn á þessu og ég veit ekkert hvort þetta er endilega gott fyrir ferðaþjónustubransann þeirra.“ Hótelkostnaðurinn er rúmar níu milljónir og samanlagður ferðakostnaður er fjórtán milljónir en inni í þeirri tölu eru dagpeningar og flug. Sigrún segir það eilitla sárabót að verð á fargjöldum hafi reynst hagstæðara en þau gerðu ráð fyrir.

Dagskrárstjórinn ætlar hins vegar að nýta mannskapinn sinn úti í Þýskalandi vel og verður með sérstakan Eurovision-þátt sunnudaginn 8. maí þar sem rifjuð verður upp leið Vina Sjonna til Düsseldorf.- fgg