Danski prinsinn á kvennafari

Danskir fjölmiðlar fara nú mikinn vegna myndbands sem sýnir Friðrik krónprins láta vel að konu á skemmtistað nokkrum dögum fyrir skírn tvíbura hans.

Myndband af hegðun Friðriks krónprins á skemmtistaðnum Simon í Kaupmannahöfn hefur valdið miklu fjaðrafoki í dönskum miðlum. Bæði Ekstrabladet og BT fjölluðu ítarlega um málið á vefsíðum sínum í gær en það var slúðurtímaritið Se og Hör sem fyrst greindi frá málinu og er hægt er að sjá myndbandið á vef Se og Hör.

Á myndbandinu sést Friðrik ansi vel við skál á umræddum skemmtistað nokkrum dögum áður en tvíburar hans og dönsku prinsessunnar Mary Donaldson verða skírðir. Það eru þó ekki drykkjusiðir Friðriks sem þykja fréttaefnið heldur sú staðreynd að hann sýnir blondínu nokkuð sérstök vinahót miðað við kvæntan mann, heldur utan um axlir hennar og er meira en lítið kumpánlegur við hana.

Eftir að fréttin fór í loftið hafa talsmenn konungshallarinnar rembst eins og rjúpur við staur að tala atvikið niður og starfsmenn skemmtistaðarins reyna nú af öllum mætti að finna hver það var sem tók upp myndbandið. Enda vill staðurinn umfram allt vernda sinn ríkasta og besta viðskiptavin. Vefsíðan MSN Starlounge hefur síðan eftir vinum ljóskunnar að þetta mál sé stormur í vatnsglasi, hún sé góð vinkona bæði Friðriks og Mary og ekkert hafi gerst á þessu pöbbarölti. „Henni þykir leiðinlegt hvernig þetta fór en skemmtistaðarferðin var sárasaklaus."

Friðrik hefur alla tíð verið mikill partípinni og var fastur gestur á slúðursíðum dagblaðanna áður en hann gekk í það heilaga. Hann átti meðal annars vingott við undirfatafyrirsætur og poppstjörnur, sem Margréti Þórhildi Danadrottningu fannst ekki nógu fínt fyrir strákinn, en hefur róast eftir að hann gekk í það heilaga með Mary.

freyrgigja@frettabladid.is