Skapbráðir snúa bökum saman

Stórleikararnir Christian Bale og Sean Penn eru nú sagðir líklegastir til að hreppa aðalhlutverkin í spennutryllinum The Last Photograph. Þetta er gæluverkefni bandaríska leikstjórans Zach Snyder sem gerði síðast hina arfaslöku Sucker Punch en hann mun einnig leikstýra næstu Ofurmennismynd.

Upphaflega var talið að Bale hefði gefið hlutverkið frá sér en nú virðist handritið hafa vakið áhuga hans á nýjan leik. Myndin segir frá stríðsfréttaritara sem lifir af árás talibana á bandaríska hermenn í Afganistan. Bale á að leika stríðsfréttaritarann en Penn yrði þá fyrrverandi sérsveitarmaður sem er fenginn til að bjarga fjölskyldumeðlimi sínum úr klóm hryðjuverkamanna og tekur Bale með sér þar sem hann veit hvernig þeir líta út. Saman takast þeir á við óvinveitta ættbálka í þessu stríðshrjáða landi.

Bale og Penn yrðu ansi magnað tvíeyki og það er eins gott að menn verði með allt á hreinu ef þeir tveir mæta á tökustað saman því þeir eru báðir þekktir fyrir að vera með ansi stuttan kveikiþráð.

Ekki liggur fyrir hvenær tökur gætu hafist en myndin hefur verið á flakki milli kvikmyndavera í Hollywood. Ef Snyder tekst að sýna fram á staðfestu Penn og Bale þarf hann þó eflaust ekki að hafa miklar áhyggjur.

- fgg