Koma saman og fagna

Tónlistarhópurinn REYK VEEK og hönnuðurnir Bóas Kristjánsson og Mundi standa fyrir skemmtikvöldinu Ultra Violence sem fram fer á Faktorý í kvöld.

Að sögn Heimis Héðinssonar tónlistarmanns var ákveðið að setja saman teiti til að fagna útgáfu nýs disks frá REYK VEEK og nýjum haustlínum þeirra Bóasar og Munda. „Við í REYK VEEK erum að gefa út safndisk með íslenskri neðanjarðartónlist sem aldrei hefur heyrst áður. Þetta er allt frumsamið efni sem við ákváðum að safna saman á einn disk. Það er svo planið að halda fleiri partí í framtíðinni þar sem við munum halda áfram að blanda saman tónlist, tísku og hönnun,“ útskýrir Heimir.

Tónleikarnir hefjast á miðnætti og fyrir 1.000 krónur fæst aðgangur að skemmtuninni og diskurinn í kaupbæti.