Eagles-menn koma með einkaþotu

„Þetta er eitt mesta brjálæði sem ég hef upplifað og hef ég þó upplifað margt,“ segir tónleikahaldarinn Ísleifur B. Þórhallsson.

Íslenskir aðdáendur bandarísku hljómsveitarinnar Eagles settu miðaverð ekki fyrir sig því uppselt er á tónleika sveitarinnar í Nýju Laugardalshöllinni þann 9. júní næstkomandi. Miðaverðið var með því hærra sem gengur og gerist á Íslandi og kostuðu miðar á A-svæðið tæplega tuttugu þúsund. Þeir miðar ruku út eins og heitar lummur og fengu færri en vildu. Miðar á B-svæðið voru heldur ekki ókeypis því þeir kostuðu fimmtán þúsund krónur en aðdáendur Eagles, sem eflaust flestir eru í eldri kantinum, létu það ekki aftra sér og bíða nú spenntir eftir að sjá goðin leika öll sín bestu lög.

Alls verða 65 starfsmenn í föruneyti Eagles sem kemur hingað til lands. Það er með því mesta sem hefur komið hingað vegna tónleikahalds. Einhver hluti starfsfólksins mætir fjórum dögum fyrir tónleikana til að hefja uppsetningu á sviði og hljóðkerfi en Eagles-liðarnir sjálfir mæta svo til landsins á einkaþotu tveimur dögum fyrir tónleikana. Þeir hyggjast nýta miðvikudaginn 8.júní til æfinga og þá munu kokkarnir á veitingastaðnum Vox hafa í nægu að snúast því þeir munu elda ofan í listamennina og þeirra menn í Laugardalshöllinni sjálfri.- fgg