Batman-hópurinn klár

Þriðja myndin í Leðurblökumanns-flokki Christopher Nolan er beðið með mikilli eftirvæntingu enda sló Dark Knight eftirminnilega í gegn fyrir tveimur árum. Fyrrum barnastjarna verður í hlutverk aðalskúrksins.

Joseph Gordon-Levitt hefur hreppt hlutverk vonda gæjans í kvikmyndinni The Dark Knight Rises sem er þriðja og væntanlega síðasta mynd Christopher Nolan um Leðurblökumanninn. Levit og Nolan þekkjast ágætlega því leikarinn fór með stórt hlutverk í hinni stórkostlegu Inception. Hann mun leika Alberto Falcone, son glæpaforingjans Falcone sem Leðurblökumaðurinn drap í Batman Begins, fyrstu mynd Nolan um riddara næturinnar.

Christian Bale verður að sjálfsögðu Bruce Wayne, milljarðarmæringurinn í ofurhetju-gallanum og Óskarskynnirinn Anne Hatheway bregður sér í þröngan latex-búning Kattakonunnar. Breski leikarinn Tom Hardy mun síðan leika skúrkinn Bane.

Gordon-Levit sagði við fjölmiðla að hann væri himinlifandi með að hafa fengið hlutverkið og ekkert síður að fá tækifæri til að endurnýja kynnin við Nolan. „Hann er leikstjóri sem kann að segja sögur og hann veit að sama hversu umhverfið er mikilfenglegt má hið mannlega aldrei gleymast." Nolan virðist hafa tröllatrú á Gordon-Levit því hann þarf að feta í illmenna-fótspor Heath Ledger sem fékk Óskarinn fyrir túlkun sína á Jókernum í síðustu mynd.

Joseph Gordon-Levit á ansi merkilegan feril að baki í Hollywood en hann er fyrrum barnastjarna og fékk sitt fyrsta hlutverk aðeins sjö ára. Hann lék lengi vel í vinsælum sjónvarpsþáttum á borð við Rosaenne og 3rd Rock from the Sun auk þess að bregða fyrir í fremur óeftirminnilegum b-kvikmyndum.

Honum hefur hins vegar gengið betur en mörgum barnastjörnum að halda sig frá meðferðarheimilum og ofneyslu áfengis og ferill hans hefur tekið mikið stökk uppá við með kynnum sínum við Christopher Nolan og nafn hans verður eflaust á allra vörum sumarið 2012.

freyrgigja@frettabladid.is