Frægir láta gott af sér leiða

Popparinn Alan Jones lætur gott af sér leiða og efnir til Stjörnuleiks í körfubolta til að safna fé fyrir krabbameinssjúk börn.

Stjörnuleikur í körfubolta á milli fjölmiðlamanna og tónlistarmanna verður haldinn í íþróttahúsinu í Frostaskjóli laugardaginn 2. apríl. Allur ágóðinn rennur til Styrktarfélags krabbameinssjúkra barna, SKB. Á meðal þeirra sem taka þátt eru Haffi Haff, Gulli Helga, Auðunn Blöndal, Örlygur Smári, Sverrir Bergmann og rapparinn Kristmundur Axel.

„Mig langaði að gera eitthvað fyrir börnin,“ segir popparinn Alan Jones, sem stendur fyrir uppákomunni. „Ég reyni að gera eitthvað einu sinni á ári til styrktar krabbameinssjúkum og núna ákvað ég að setja saman körfuboltalið með frægu fólki og nokkrum venjulegum körfuboltaspilurum. Amma mín dó úr brjóstakrabbameini og síðan þá hefur mig alltaf langað til að styrkja þetta málefni.“

Alan er Bandaríkjamaður en hefur búið hér á landi í níu ár. Margir kannast við hann úr sjónvarpsþáttunum X-Factor, þar sem hann stóð sig með mikilli prýði. Hann er mikill aðdáandi Michaels Jackson og heiðraði goðið með minningartónleikum í fyrra. Í hálfleik á körfuboltaleiknum ætlar hann einmitt að syngja lagið Heal the World, sem Jackson gerði vinsælt á sínum tíma. Klappstýrur verða einnig á staðnum til að gera stemninguna enn þá betri. Leikurinn fer fram milli klukkan 16 og 17 og aðgangseyrir er 500 krónur.freyr@frettabladid.is