Kona Stiegs Larsson til Íslands

„Ég myndi telja að hún hafi margt áhugavert fram að færa. Við hlökkum til að taka á móti henni,“ segir Ilmur Dögg Gísladóttir hjá Norræna húsinu.

Eva Gabrielsson, fyrrverandi sambýliskona sænska metsöluhöfundarins sáluga Stiegs Larsson, kemur hingað til lands á höfundakvöld í maí á vegum Norræna hússins í samstarfi við bókaforlagið Bjart. „Okkur fannst hún bæði áhugaverður einstaklingur sem hefur verið mikið í umræðunni í bókmenntaheiminum og við vildum líka hafa ákveðna breidd í dagskránni, gera hana ekki eins dæmigerða,“ segir Ilmur Dögg.

Bók Gabrielsson, Millennium, Stieg og ég, hefur verið gefin út í Svíþjóð og Noregi en Bjartur, sem hefur gefið út bækur Stiegs Larsson, ákvað að gefa hana ekki út hér á landi. Í henni fjallar hún um 32 ára samband sitt og Larssons og hinn vinsæla Millennium-þríleik. Einnig ræðir hún um stirð samskipti sín við fjölskyldu Larssons. Vegna sænskra erfðalaga fékk hún engan arf eftir Larsson, sem hefur selt bækur sínar í milljónavís um allan heim. Gabrielsson hefur einnig gefið út bókina Sambo – Ensammare än du tror. Bæði er hægt að leigja þá bók og hina fyrrnefndu á bókasafni Norræna hússins.

Höfundakvöldin í Norræna húsinu hefjast 14. apríl og standa yfir til 1. júní. Þar koma fram rithöfundar og ljóðskáld frá Grænlandi, Færeyjum, Svíþjóð, Noregi og Íslandi. - fb