Sjö manneskjur í fagráði Airwaves

„Ég er mjög ánægður með þetta. Hugmyndin er að reyna að bæta festivalið og gera það skemmtilegra,“ segir Grímur Atlason, framkvæmdastjóri tónlistarhátíðarinnar Iceland Airwaves.

Fagráð Airwaves hefur verið stofnað og er það skipað sjö aðilum, flestum úr tónlistargeiranum. Um er að ræða tónlistarmanninn Benedikt Reynisson, Hildi Maral Hamíðsdóttur viðburðastjóra, Steinþór Helga Arnsteinsson hjá Senu, söngkonuna Hafdísi Huld, Magnús Trygvason Eliassen úr Amiinu, Egil Harðarson ritstjóra Rjómans.is og Sunnu Viðarsdóttur, tónlistaráhugamann og tónleikagest til margra ára.

„Þetta er algjörlega óformlegur vettvangur. Við erum að velta fyrir okkur ýmsu hvort sem það eru tónleikastaðir, hljómsveitir og upplifun. Við viljum leyfa fólki úr ýmsum áttum að tjá sig um það,“ segir Grímur. Ráðið hefur þegar fundað einu sinni og mun hittast einu sinni í mánuði þar til hátíðin hefst í haust. Fagráðið hefur ekki neitunarvald og ætlunin er að fólki verði skipt út með nokkuð reglulegu millibili.

Þátttaka Sunnu Viðarsdóttur í ráðinu vekur athygli, enda hefur hún ekki starfað áður í tónlistarbransanum. „Ég þekki hana ekki neitt. Hún hefur komið á ofboðslega mikið af viðburðum á tíu eða tuttugu ára tímabili. Við viljum reyna að hafa líka fólk sem kemur ekki úr neinni ákveðinni kreðsu,“ segir Grímur.- fb