Yfirburðasigur Atrum

Dauðarokkshljómsveitin Atrum stóð uppi sem sigurvegari í hljómsveitakeppninni Wacken Metal Battle, sem fór fram á Sódómu á laugardagskvöld. Sigur Atrum var nokkuð öruggur og dómnefnd var sammála um að hljómsveitin hefði skarað fram úr. Atrum keppir því fyrir Íslands hönd á lokakeppninni sem fer fram á Wacken-þungarokkshátíðinni í Þýskalandi í sumar, sem er sú stærsta sinnar tegundar í heiminum.

Þorsteinn Kolbeinsson, sem skipulagði undankeppnina á Íslandi, segir hljómsveitina eiga von á erfiðri keppni í Þýskalandi, en 30 sigurhljómsveitir taka þátt í henni. „Ég held að það sé ekki gott að fara með of háar væntingar í keppnina,“ segir hann spurður út í möguleika Atrum í lokakeppninni. „Hljómsveitin þarf samt að sjálfsögðu að vera metnaðarfull, hún græðir ekkert á þessu nema að gera þetta almennilega.“

Þorsteinn bætir við að hljómsveitin Wistaria, sem sigraði í íslensku undankeppninni í fyrra, hafi staðið sig gríðarlega vel á sviðinu í Þýskalandi en þrátt fyrir það ekki átt upp á pallborðið hjá dómnefndinni. „En það er alveg raunhæfur möguleiki fyrir Atrum.“- afb