Reknir í örfáar vikur svo að þeir fái bætur

„Þetta heitir tímabundin rekstrarstöðvun og er mjög þekkt í fiskinum,“ segir Ólafur Sigurðsson, framkvæmdastjóri Heilsustofnunar Náttúrulækningafélagsins, um uppsagnir 38 starfsmanna stofnunarinnar.

Heilsustofnun NLFÍ í Hveragerði verður í sparnaðarskyni lokað í níu vikur í sumar og sumarhótel rekið í staðinn. Af 115 starfsmönnum hefur 38 verið sagt upp en þeir eiga að snúa aftur þegar heilsuhælið verður opnað að nýju. Flestir starfsmennirnir eiga sex vikna sumarfrí og taka það á meðan lokunin varir.

Ólafur Sigurðsson, framkvæmdastjóri HNLFÍ, kveðst hafa rætt við Vinnumálstofnun um tímabundna rekstrarstöðvun heilsuhælisins og fengið staðfest að fólk ætti rétt á atvinnuleysisbótum þann tíma sem orlofið nái ekki yfir. Samráð hafi einnig verið við stéttarfélög. „Við segjum upp fólki en gerum ekki ráð fyrir öðru en að starfsemin fari í gang aftur að lokuninni yfirstaðinni,“ segir Ólafur.

Um 30 af þeim 38 sem sagt er upp eru félagsmenn í Eflingu. „Heilsustofnunin fór yfir það með Vinnumálastofnun hvort það væri ekki rétt mat að starfsmennirnir myndu þá strax í framhaldinu fá atvinnuleysisbætur og þeir fengu það staðfest að það væri rétt,“ segir Harpa Ólafsdóttir, yfirmaður kjarasviðs Eflingar.

Unnur Sverrisdóttir, forstöðumaður stjórnsýslusviðs Vinnumálastofnunar, segir hins vegar alls ekkert samráð hafa verið haft við stofnunina. „Það hringdi maður frá Náttúrulækningafélaginu og bar þetta undir mig og ég sagði honum að mín fyrsta innstilling væri að þetta gengi engan veginn svona,“ segir Unnur sem kveður af og frá að um sé að ræða sömu aðstæður og hjá fiskvinnslufyrirtækjum. „Það eru algerlega sérlög sem eiga bara við um nákvæmlega þá starfsgrein.“

Kristín Á. Guðmundsdóttir, formaður Sjúkraliðafélags Íslands, segir málið vafasamt. „Við teljum að þarna sé í raun verið að misnota atvinnuleysisbætur,“ segir Kristín, sem kveðst jafnframt vonsvikin yfir því að heilbrigðisyfirvöld leyfi stofnun, sem styrkt sé af ríkinu á heilsársgrundvelli, að komast upp með loka fyrir starfsemina. - gar