Hendricks er táknmynd fegurðar

Nafn Christinu Hendricks hefur verið á allra vörum síðustu misseri eftir að hún sló í gegn í sjónvarpsþáttunum Mad Men. Áhrifafólk innan tískuheimsins hefur barist fyrir því að næla í leikkonuna og nú er hún gengin út. Það var sjálf Vivienne Westwood sem samdi við Hendricks um að auglýsa nýja skartgripalínu hennar.

Samstarf þessara tveggja drottninga þarf kannski ekki að koma á óvart. Hin 35 ára gamla Hendricks hefur oftsinnis farið fögrum orðum um Westwood. „Þegar ég var ung stúlka klippti ég út myndir af kjólunum hennar úr tímaritum, jafnvel þótt ég hefði aldrei efni á þeim.“ Hún segir enn fremur að hún geti ekki beðið eftir því að ganga með skartgripi átrúnargoðsins á rauða dreglinum.

Hin 69 ára Westwood gæti ekki verið ánægðari með fyrirsætuna sína. „Christina er táknmynd fegurðar og við erum hæstánægð að hafa getað fengið hana með okkur í lið. Stíll hennar passar vel við hönnun mína. Hún hefur reynst fullkomin fyrirsæta fyrir herferðina okkar.“

Nýja skartgripalínan er nú komin í sölu í verslunum Vivienne Westwood í London og Los Angeles.