Sú besta í tuttugu ár

Hljómsveitin R.E.M. gefur út sína fimmtándu hljóðversplötu. Sú besta síðan Out of Time, segir bassaleikarinn Mike Mills.

Fimmtánda hljóðversplata bandaríska tríósins R.E.M., Collapse Into Now, kemur út í næstu viku. Þrjú ár eru liðin frá útgáfu hinnar prýðilegu Accelerate sem kom hljómsveitinni aftur á kortið eftir hina misheppnuðu Around the Sun. Upptökustjóri Accelerate var hinn írski Jacknife Lee, sá hinn sami og stjórnar upptökum á nýju plötunni. Hann hefur á ferli sínum unnið með U2, Weezer og Snow Patrol og þykir afar fær á sínu sviði, enda með Grammy-verðlaun uppi á arinhillunni.

Upptökur fóru fram í þremur mismunandi borgum, Berlín, Nashville og í New Orleans. Hljóðverið í Berlín nefnist Das Hansa Tonstudio og er sögufrægt mjög. Þar voru plötur á borð við Heroes með David Bowie, Achtung Baby með U2 og Lust for Life með Iggy Pop teknar upp. Á meðal góðra gesta á Collapse Into Now eru söngkonan Patti Smith, gömul vinkona söngvarans Michaels Stipe, Eddie Vedder úr Pearl Jam og pönkgellan Peaches.

Bassaleikarinn Mike Mills segir að lagt hafi verið upp með að hafa plötuna fjölbreyttari en Accelerate, þar sem fylgt var einni stefnu frá upphafi til enda. Þá voru lögin stutt, hröð og hávær en í þetta sinn skipti engu hvernig lögin voru uppbyggð. Ef þau voru nógu góð voru þau sett á plötuna. Að mati Mills jafnast útkoman á við það besta sem hefur komið úr herbúðum R.E.M og í raun finnst honum Collapse Into Now besta plata sveitarinnar síðan Out of Time kom út 1991 en hún skaut bandinu upp á stjörnuhimininn og seldist í yfir átján milljónum eintaka. Sannarlega stór orð þegar haft er í huga að síðan þá hefur R.E.M. meðal annars gefið út stórvirkið Automatic for the People.

R.E.M., sem hefur yfirleitt verið frekar löt við tónleikaferðir, býst ekki við að fylgja nýju plötunni eftir með ferðalagi líkt og hún gerði í kjölfar Accelerate. Hvort það falli vel í kramið hjá útgáfufyrirtækinu Warner Brothers skal ósagt látið. Collapse Into Now er síðasta platan í samningi sveitarinnar við Warner sem hefur staðið yfir frá árinu 1988 þegar Green kom út.

Þrátt fyrir yfirlýsingar Mills um gæði nýju plötunnar hefur hún fengið nokkuð misjafna dóma. Breska tímaritið Q gefur henni aðeins tvær stjörnur, sem er óvænt þegar risaband á við R.E.M. er annars vegar, á meðan hið bandaríska Rolling Stone gefur henni fjórar af fimm mögulegum og segir sveitina í sínu besta formi í langan tíma. Bandaríska tímaritið Spin er á sama máli og gefur sveitinni 8 í einkunn af 10 og segir plötuna hljóma eins og gamalkunnan vin sem sífellt er hægt að treysta á. freyr@frettabladid.is