Eigandi vatnsbóls vill að Mosfellsbær borgi

Meðeigandi Mosfellsbæjar í jörðinni Laxnesi 1 krefst þess að bærinn borgi fyrir vatnstöku úr landinu síðustu 40 árin. Bæjarráð hafnar því og vísar í staðinn í samkomulag við aðra meðeigendur að jörðinni um vegagerð í Laxnesi.

Þórarinn Jónsson, hesta- og ferðaþjónustubóndi í Laxnesi 1, á tæp 6 prósent í jörðinni. Mosfellsbær á fjórðung jarðarinnar og Ragnheiður K. Hansson 44 prósent. Þá eiga hinar þekktu Wathne-systur þrjár hver sex prósent landsins og dánarbú móður þeirra önnur sex prósent. Jörðin er í óskiptri sameign.

Jón Gunnar Zoëga hæstaréttarlögmaður hefur nú fyrir hönd Þórarins óskað eftir því að Mosfellsbær greiði meðeigendum sínum í Laxnesi fyrir töku vatns úr landinu frá árinu 1970. Miðar lögmaðurinn við upplýsingar frá bænum sjálfum um vatnstöku síðustu ára og áætlar að vatnsnotkunin sé orðin tæplega 5,3 milljónir rúmmetra þessi fjörutíu ár. Vatnsbólið í Laxnesi er svokölluð Guddulaug.

Jón Gunnar stakk upp á að fengnir yrðu dómkvaddir matsmenn til að meta verðmæti vatnsins. Eftir að því var ekki svarað af hálfu Mosfellsbæjar hafði hann samband við Orkuveitu Reykjavíkur þar sem hann kveðst í nýju bréfi til bæjarins hafa fengið upplýst að verð á rúmmetra af vatni sé 24,18 krónur. Þess vegna sé skuld Mosfellsbæjar nú við eigendur Laxness orðin ríflega 127 milljónir króna.

Bæjarráð Mosfellsbæjar segist í svari til lögmanns Þórarins enga afstöðu taka til verðmats vegna vatnstökunnar í Laxnesi 1. „Bæjarráðið minnir á að allar hugsanlegar kröfur vegna vatnstökunnar, ef um réttmætar kröfur er að ræða sem eldri eru en fjögurra ára, eru fyrndar," segir bæjarráðið en bætir hins vegar við að það vilji samstarf við Þórarin um viðhald vegar og deiliskipulag í Laxnesi. Samkomulag um slíkt samstarf var gert við alla aðra meðeigendur bæjarins í desember síðastliðnum.

Í bréfi Jóns Gunnars Zoëga segir að álit Mosfellsbæjar í málinu breyti ekki staðreyndum. „Hins vegar er honum frjálst að horfa fram hjá því að allir eigendur Laxness 1, að undanskildum Mosfellsbæ, eru aðilar að þessari beiðni um frágang vatnsmálsins," segir í bréfi lögmannsins. En nákvæmlega þetta atriði líta bæjaryfirvöld allt öðrum augum:

„Rétt er að taka fram að bæjarráð hefur fengið það staðfest skriflega frá lögmanni Ragnheiðar Jónasdóttur, Wathne systrum og dánarbúi Soffíu Wathne að þau hafi ekki beðið yður eða nokkurn annan að afla upplýsinga um vatnsnotkunina," svarar bæjarráðið lögmanni Þórarins Jónssonar.

gar@frettabladid.is