Fagna áttunda barni Rods Stewart

„Þetta er mikil hátíðarstund. Það er aldrei of mikið af litlum Roddurum í heiminum," segir útvarpsmaðurinn Andri Freyr Viðarsson, formaður Rodway, sem er annar tveggja aðdáendaklúbba söngvarans Rods Stewart á Íslandi.

Hinn 66 ára gamli Stewart eignaðist áttunda barnið sitt í vikunni með eiginkonu sinni Penny Lancaster. Drengurinn hefur fengið nafnið Aiden og er annað barn hjónakornanna.

„Klúbburinn gleðst og planið er að opna rauðvínsbelju í kvöld. Þeir meðlimir sem eru á landinu ætla að hittast," segir Andri Freyr.

Og setja plötu á fóninn?

„Já, ekki spurning. Þær eru oftast á fóninum. Það er mikið búið að ræða hvaða plötu, en við erum að spá í að hlusta á Unplugged-plötuna í tilefni dagsins. Hann sýnir alltaf sitt besta, en þetta er yndisleg plata. Maður upplifir sig alltaf eins og maður sé í salnum þegar maður hlustar á hana."

Birgir Ísleifur Gunnarsson, einn af meðlimum hins aðdáendaklúbbs Rods Stewart á Íslandi, segir það dæmigert fyrir smekkleysi Rodway að opna belju af rauðvíni í tilefni dagsins. „Við Daníel gerum eitthvað miklu betra en það," segir hann og á þá við söngvarann Daníel Ágúst Haraldsson. „Við þurfum að opna skoskt eðalviskí. Ég held að það eigi betur við."

Birgir segir fæðingu áttunda barns Stewart mikið gleðiefni fyrir félaga klúbbsins og býst við að setja plötu á fóninn af því tilefni. „Ætli maður hlusti ekki á Every Picture Tells a Story," segir Birgir. „Setji kannski Mandolin Wind á fóninn. Það er magnað lag."- afb