Bæjarstjórnin segir ólíðandi að OR framkalli jarðskjálfta

Bæjarstjórn tekur undir áhyggjur íbúa vegna síendurtekinna jarðskjálftahrina sem orsakast af niðurdælingu affallsvatns frá Hellisheiðarvirkjun. Fjallað var um málið í fréttum Stöðvar 2 um helgina og í gær ályktaði bæjarstjórnin að það væri með öllu ólíðandi að framkallaðir séu jarðskjálftar af mannavöldum, allt að 3,5 á Richter skala, með fyrrgreindum áhrifum á nærumhverfið.

„Bæjarstjórn óskar eftir upplýsingum frá Orkuveitu Reykjavíkur um hvort að í umhverfismati Hellisheiðarvirkjunar hafi verið gerð grein fyrir þessum afleiðingum niðurdælingar á nærumhverfið,“ segir í ályktuninni. „Ennfremur óskar bæjarstjórn eftir því að Orkuveita Reykjavíkur geri grein fyrir því hvort búast megi við sambærilegum jarðskjálftum við niðurdælingu í fyrirhugaðri jarðvarmavirkjun í Hverahlíð.“

Bæjarstjórnin fagnar einnig frumkvæði Umhverfis- og Iðnaðarráðuneyta en ráðherrar hafa óskað eftir úttekt vísindamanna Veðurstofunnar, Orkustofnunar og Almannavarna á áhrifum jarðskjálftanna. „Það er krafa bæjarstjórnar að aðrar aðferðir verði notaðar til niðurdælingar á Hellisheiðarsvæðinu, svo íbúar í Hveragerði og nágrenni þurfi ekki framvegis að finna fyrir jarðskjálftum vegna hennar.“