Svarar bréfi með áminningu

Samtök verslunar og þjónustu (SVÞ) sendu bréf til landbúnaðarráðuneytisins í gær, þess efnis að svínabændur væru nú að hækka svínakjötsverð sökum viðvarandi kjúklingaskorts í búðum.

„Sú staða sem uppi er í kjúklingaframleiðslunni hefur leitt það af sér að svínakjötsframleiðendur sjái sér nú leik á borði og tilkynna ítrekað hækkun á svínakjöti til verslana [...]," segir í bréfinu.

Tíðar salmonellusýkingar í kjúklingabúum hafa orðið til þess að borið hefur á kjúklingaskorti á markaðnum og birgðir hafa minnkað gífurlega. Fyrir áramót bauð ráðuneytið út 200 tonna innflutningskvóta á erlendum kjúklingi í ljósi aðstæðna.

„Það er alveg ljóst að ráðuneytið hefur brugðist við," segir Bjarni Harðarson, aðstoðarmaður landbúnaðarráðherra. „Verðbreytingar á svínakjötsmarkaði eru ekki á neinn hátt á ábyrgð ráðuneytisins."

Fréttastofa Stöðvar 2 birti bréf SVÞ í kvöldfréttum sínum 6. janúar en það vekur athygli Bjarna að bréfið er dagsett í gær, hinn 7. janúar, sama dag og það barst ráðuneytinu. „Ég er mjög undrandi á því að sjá bréf til ráðuneytisins í sjónvarpinu sem hefur í raun ekki verið skrifað," segir hann. „Hingað barst bréfið ekki fyrr en 7. janúar."

Ólafur Friðriksson, skrifstofustjóri ráðuneytisins, svaraði bréfi SVÞ í gær og vakti meðal annars athygli á þeim 200 tonnum af tollkvóta af erlendum kjúklingi sem boðin voru út í lok ársins.- sv