Með öllu óboðlegt að aldraðir fari í bað einu sinni í viku

ViVe - samtök um virkari velferð segja með öllu óboðlegt að aldraðir á stofnununum séu baðaðir einu sinni í viku eins og greint var frá í Fréttablaðinu í dag. Samtökin lýsa sig reiðubúin að hefja starf með hagsmunaaðilum, stjórnvöldum og öðrum að undirbúningi þess að koma á fót notendastýrðri persónulegri þjónustu við aldraða sem koma megi að miklu leyti í stað þeirrar stofnanavistar sem öldruðum stendur til boða nú. Samtökin segja nóg komið af mannréttindabrotum á öldruðu fólki.

„Þetta er með öllu óboðlegt og lýsandi fyrir þær ógöngur sem búsetustofnanakerfið á Íslandi hefur ratað í," segir í tilkynningu frá samtökunum. „Mannréttindi eru daglega brotin á öldruðum sem eru sviptir sjálfræði og jafnvel fjárræði og þeim komið fyrir á stofnunum sem þeir sjálfir vilja ekki búa á. Þetta er gert vegna skorts á persónulegri þjónustu við aldraða á þeirra eigin forsendum. Þessu vill ViVe breyta ekki síðar en um næstu áramót þegar málefni aldraðra flytja yfir til sveitarfélaga."

„Málefni fatlaðra fluttust frá ríki til sveitarfélaga um síðustu áramót. Í aðdraganda þeirrar breytingar vann ViVe á þverpólitískan og þverfaglegan hátt, ásamt með notendum þjónustunnar, að því að skipuleggja nýjar áherslur um notendastýrða persónulega aðstoð(NPA) fyrir fatlaða. Þetta verk tókst mjög vel og er nú búið að festa NPA fyrir fatlaða í lög. Þessu hyggjumst við einnig ná fram fyrir aldraða þannig að þetta sveigjanlega þjónustuform sem viðheldur lengur virkni fólks, þátttöku og innihaldsríku lífi verði innleitt fyrir alla á Íslandi sem sökum fötlunar eða öldrunar þurfa notendastýrða þjónustu í því skyni að lifa sjálfstæðu lífi. Þetta fyrirkomulag er ekki bara sjálfsagt mannréttindamál heldur er um að ræða mun hagkvæmari og eftirsóknarverðari kost en hefðbundnar búsetustofnanir. Nú er nóg komið af mannréttindabrotum á öldruðu fólki!"