Charlie Sheen er lítið barn

Charlie Sheen er vafalítið aðalstjarnan það sem af er þessa árs en sífellt fleiri efast um geðheilbrigði leikarans. Bæði bróðir og faðir leikarans tjáðu sig um ástandið á honum um helgina.

Charlie Sheen hefur ákveðið að ferðast um allar helstu borgir Bandaríkjanna og Kanada með sýninguna My Violent Torpedo of Truth sem myndi útleggjast á íslensku Ofbeldisfullur hvirfilbylur sannleikans. Sheen hefur verið stöðugt í fréttum á árinu vegna ofneyslu áfengis og eiturlyfja, undarlegs sambands síns við klámstjörnur og nú síðast vegna heimsmets sem hann setti á Twitter. Búið er að reka hann úr sjónvarpsþáttunum Two and a half men en hann var launahæsti leikarinn í bandarísku sjónvarpi fyrir þá þætti.

Faðir Charlie er stórleikarinn Martin Sheen en hann mætti í viðtal við The Daily Telegraph sem birt var um helgina ásamt hinum syninum, Emilio Esteves. Martin og Charlie léku saman í Wall Street á níunda áratug síðustu aldar og sá gamli átti í erfiðleikum með áfengið og eiturlyfin eins og sonurinn á nú. Í viðtalinu við Daily Telegraph segir Martin að sonur sinn hafi þroska á við barn. „Þegar þú ert fíkill þá þroskast þú ekki neitt. Þegar þú ert búinn að fara í meðferð og hættur öllu sukki þá byrjar þú upp á nýtt," hefur Telegraph eftir pabbanum.

Sjálfur fékk hann hjartaáfall við tökur á Apocalypse Now eftir Francis Ford Coppola eftir mikla neyslu og segir í viðtalinu að hann hafi upplifað ámóta geðveiki og sonur hans. „Það var fyrir framan tökuvélarnar þegar við vorum að taka upp upphafsatriðið á Apocalypse Now. Ég veit alveg hvað Charlie er að ganga í gegnum."

Martin er hins vegar sannfærður um að það sé ljós við enda gangsins en viðurkennir að sonur sinn sé í erfiðri stöðu. „Hann verður að vera hugrakkur, það þarf hugrekki til að horfast í augu við sjálfan sig," freyrgigja@frettabladid.is