Heilaheill nýtur góðs af kanilsnúðadeginum

Síðastliðna helgi var stóri kanilsnúðadagurinn haldinn hátíðlegur í IKEA. Markmiðið var að safna fé til styrktar samtökunum Heilaheill, sem vinnur að hagsmunamálum einstaklinga sem orðið hafa fyrir heilablóðfalli.

Í tilefni dagsins var haldin keppni þar sem fulltrúar frá þremur bakaríum og veitingastað IKEA kepptu um það hver bakað hafði besta kanilsnúðinn. Það kom svo í hlut gesta IKEA að smakka og velja þann besta, en gestir höfðu kost á því að láta frjálst framlag af hendi rakna í söfnunarbauk þess sem hafði bakað besta kanilsnúðinn að þeirra mati. Fulltrúar Mosfellsbakarís söfnuðu mestu og standa því uppi sem Kanilsnúðameistarar ársins 2011.

Allir bakarar gáfu vinnu sína, en IKEA greiddi hráefni keppenda og tvöfaldaði frjáls framlög gesta. Samtals renna því um 600.000 krónur til Heilaheilla. Af þessu tilefni vilja þáttakendur ásamt IKEA senda samtökunum hamingjuóskir. Að sama skapi vill IKEA þakka þeim bakaríum sem sendu fulltrúa sína til þáttköku fyrir óeigingjarnt starf, en þau eru Konditori Copenhagen, Sandholt og Mosfellsbakarí. Einnig vill verslunin koma á framfæri þökkum til þeirra fjölmörgu gesta verslunarinnar sem lögðu söfnuninni lið með fjárframlagi um helgina.