Hækka verð í sund og táningar á fullu gjaldi

„Með þessu móti er hugmyndin að ferðamenn og aðrir sem eru búsettir utan höfuðborgarsvæðisins greiði gjald sem endurspeglar betur rekstrarkostnað sundstaða," segir starfshópur á vegum Samtaka sveitarfélaga á höfuðborgarsvæðinu um þá tillögu sína að hækka verulega gjald fyrir stakar ferðir í sund.

Starfshópurinn undirbýr breytingar á íþróttastyrkjum og rekstri íþróttamannvirkja og sundlauga á höfuðborgarsvæðinu. Nýta á betur tekjustofna sem felast í þessum mannvirkjum, auka samræmi og lækka rekstrarkostnað með samnýtingu og sameiginlegum innkaupum.

Markmiðið með því að hækka gjald fyrir stakar sundferðir verulega er að fá íbúa höfuðborgarsvæðisins til að kaupa frekar afsláttarkort en stakar ferðir.

„Jafnframt er lagt til að skoða mörk á barnagjaldi og færa það aftur til tólf ára aldurs í stað átján ára," segir í tillögu starfshópsins, sem einnig vill skoða hvort gjald fyrir stakar ferðir verði mismunandi eftir þjónustu sem í boði sé.

„Samhliða þarf að samræma afsláttarkort þannig að kort keypt á einum stað nýtist hvar sem er á svæðinu en á móti þarf að eiga sér stað uppgjör milli staða," segir starfshópurinn. Ákvörðun um slíkt kerfi útheimti þó greiningu á kostnaði og kostum og göllum. Þá þurfi að sameinast um útboð á vörukaupum.

Að endingu er lagt til „að skipta höfuðborgarsvæðinu í nokkur undirsvæði með það fyrir augum að auka nýtingu með því að samræma opnunartíma og fækka opnum sundlaugum á „rauðum dögum" þegar kostnaður við mönnun er mestur".

Borgarráð Reykjavíkur hefur samþykkt umsögn íþrótta- og tómstundaráðs, sem gerir ekki „efnislegar athugasemdir" við tillögur starfshópsins. Ómar Einarsson, framkvæmdastjóri ÍTR og formaður hins sameiginlega starfshóps sveitarfélaganna, segir það þó ekki fela í sér að ákvarðanir hafi verið teknar um tilteknar breytingar.

Aðgangseyrir fyrir fullorðna á sundstöðum í Reykjavík hækkaði 1. janúar á þessu ári úr 360 krónum í 450. Fyrir tæpum sjö árum, í árslok 2004, var gjaldið 230 krónur. Hækkunin síðan þá er 96 prósent. Á sama tíma hækkaði vísitala neysluverðs um 62 prósent.- gar