Slökkt á öðru hverju ljósi á Reykjanesbrautinni

„Við spörum tíu milljónir á þessu,“ segir G. Pétur Matthíasson, upplýsingafulltrúi Vegagerðarinnar, sem hefur slökkt á öðrum hverjum ljósastaur á Reykjanesbrautinni.

Vegfarandi sendi Vísi póst í morgun og benti á að svona væri í pottinn búið.

Aðspurður segir G. Pétur nokkuð deilt um það hvort lýsing á vegum utan þéttbýlis veiti meira öryggi. „Fyrir utan að staurarnir sjálfir geta verið hættulegir,“ bætir G. Pétur við.

Vegagerðin hefur þurft að spara verulega eftir hrun með margvíslegum hætti. Aðgerðirnar nú eru hluti af því.

Hann segir að meðal sparnaðaraðgerða Vegagerðarinnar hafi verið að slökkva algjörlega á ljósastaurunum á Reykjanesbrautinni síðasta sumar. Það er að segja í tvo mánuði. „Og enginn tók sérstaklega eftir því,“ segir G. Pétur.

Hann segir að slökkt verði á öðrum hverjum ljósastaur til frambúðar, þó það verði endurskoðað breytist aðstæður.