Tyrknesk stjórnvöld ekki óskað eftir aðstoð

Óttast er að hundruð hafi látið lífið eftir að snarpur jarðskjálfti reið yfir austurhluta Tyrklands í dag. Upptök skjálftans voru skammt frá borginni Van og hrundu nokkur hús í miðborginni. Íslenska alþjóðabjörgunarsveitin vaktar ástandið.

Jarðskjálftinn sem reið yfir rétt fyrir hádegi að íslenskum tíma mældist sjö komma tvö stig og var á um 20 kílómetra dýpi. Þá hafa þó nokkrir eftirskjálftar fundist á svæðinu.Tugir húsa, í bænum Ercis í austur Tyrklandi nálægt landamærum við Íran, hrundu til grunna sem og hús í bænum Van.

Þúsundir íbúa streymdu út á götur borga í geðshræringu og mátti heyra skelfingaróp úr húsarústum. Björgunarsveitarmenn og íbúar hafa í allan dag leitað í að eftirlifendum en óttast er að fimm hundruð til þúsund manns hafi látið lífið. Þá er unnið að því að koma gervihnattarsímum á svæðið þar sem samband hefur rofnað.

Íslenska alþjóðabjörgunarsveit Landsbjargar var sett á vöktunarstig eftir skjálftann í morgun en Ólafur Loftsson er einn af stjórnendum sveitarinnar.

„Þá erum við að fylgjast með atburðum, við erum tengdir inn á upplýsingakerfi hjá Sameinuðu þjóðunum, Evrópusambandinu og fleirum til að sjá hvort að þörf sé á aðstoð. Enn sem komið er hafa tyrknesk stjórnvöld ekki óskað eftir erlendri astoð,“ segir Ólafur.