Breyta nýlegu hringtorgi fyrir milljónir

Vegagerðin vinnur nú að því að víkka hringtorg á Suðurlandsvegi í Norðlingaholti. Þó að hringtorgið sé nýlegt hafa flutningabílstjórar kvartað mikið undan því vegna þess hversu þröngt það þykir. Breytingarnar við hringtorgið kosta um tíu milljónir króna, að sögn Vegagerðarinnar.

„Þeir hafa kvartað sérstaklega mikið undan þessu hringtorgi miðað við önnur. Þeir hafa átt í erfiðleikum með að fara í gegnum það án þess að rekast upp á kanta svo það var ákveðið að verða við þeirra óskum um að gera torgið aðeins rýmra,“ segir Jónas Snæbjörnsson, svæðisstjóri suðvestursvæðis hjá Vegagerðinni. Hann segir að verið sé að minnka miðeyjuna á torginu svo rýmra verði fyrir flutningabíla. „En hættan er auðvitað sú að fólksbílar geti þá líka farið aðeins hraðar í gegn, það er samspil þar á milli.“

Jónas segir að um þrjú ár séu síðan torgið var lagt. „Torgið uppfyllti okkar kröfur en menn voru ekki ánægðir með það. Það þótti heldur þröngt. Flest hinna hringtorganna eru tvöföld svo það er auðveldara að fara í gegnum þau,“ segir Jónas, en torgið sem verið er að breyta er ein akrein. - þeb