Heiður að fá Annan til Íslands

„Ég tel það vera mikil og góð tíðindi og mikill heiður, ekki bara fyrir Háskóla Íslands heldur íslenska þjóð að einn af fremstu leiðtogum veraldar á síðustu áratugum skuli vilja heiðra Háskola Íslands á þessum tímamótum," segir Ólafur Ragnar Grímsson, forseti Íslands, í samtali við Vísi. Kofi Annan, fyrrverandi framkvæmdastjóri Sameinuðu þjóðanna, mun koma hingað til lands í byrjun október og halda fyrirlestur í Háskóla Íslands þann 7. október næstkomandi í tilefni af hundrað ára afmæli skólans.

„Ásamt Nelson Mandela nýtur hann einna mestrar virðingar í allri veröldinni. Og í ljosi erfiðleika okkar Íslendinga á síðustu þremur  árum og alþjóðlegrar stöðu eru það ánægjuleg tíðindi að hann skyldi taka boði okkar að koma hingað á þessum tímamótum," segir Ólafur Ragnar. 

Aðspurður segir Ólafur Ragnar að það sé mjög sjaldgæft að menn sem hafi gegnt embætti aðalritara Sameinuðu þjóðanna komi til Íslands. „Mig minnir að U Thant hafi komið hér fyrir hálfri öld eða svo. Síðan kom Kofi hingað 1997, að mig minnir, á ferð sinni um Norðurlönd,“ segir Ólafur Ragnar. Hann þekki engin önnur tilvik.

Auk þess að halda fyrirlestur í Háskóla Íslands mun Ólafur Ragnar Grímsson kynna fyrir Kofi Annan íslenkst hugvit varðandi jarðhitanýtingu og loftslagsrannsóknir með tilliti til landbúnaðar og fæðuframleiðslu sem gæti nýst í Afríku. „Því hann hefur ákveðið eftir að hann hætti að beita sér sérstaklega fyrir þróun mála í Afríku,“ segir Ólafur Ragnar.