Dæmdir ofbeldismenn grunaðir um fjárkúgun og frelsissviptingu

Tveir þekktir dæmdir ofbeldismenn sitja nú í einangrun í gæsluvarðhaldi á Litla Hrauni en þeir eru grunaðir um að hafa svipt annan mann frelsi og reynt að kúga út úr honum fé.

Mennirnir tveir voru nýlega látnir lausir eftir að hafa afplánað dóma fyrir grófa ofbeldisglæpi. Mennirnir eru taldir hafa skipulagt verknaðinn í sameiningu en annar þeirra fór með fórnarlambið í útibú Íslandsbanka við Stórhöfða 17 í síðustu viku og reyndi að kúga út úr honum fé með því að hóta honum ofbeldi ef hann yrði ekki við kröfum mannanna um að taka peninga út af bankareikningnum sínum og afhenda þeim.

Samkvæmt upplýsingum fréttastofu mun manninum hafa tekist með merkjasendingu að láta starfsmann útibúsins vita að ekki væri allt með felldu og lét starfsfólkið lögreglu vita í kjölfarið.

Áform mannanna um að kúga fé út úr fórnarlambinu fóru því út um þúfur því lögreglan kom á vettvang áður. Samkvæmt upplýsingum fréttastofu eru tengsl á milli fórnarlambsins og annars mannanna. Þeir eiga sameiginlega kunningja og var um nokkurs konar uppgjör að ræða en það mun þó ekki vera vegna fíkniefnaviðskipta.

Björgvin Björgvinsson, aðstoðaryfirlögregluþjónn, sagði í samtali við fréttastofu að mennirnir hefðu verið úrskurðaðir í gæsluvarðhald til sextánda þessa mánaðar og að þeir væru grunaðir um frelsissviptingarbrot, hótanir og fjárkúgun. Mennirnir munu ekki hafa beitt fórnarlambið ofbeldi. Björgvin sagði að annar hinna grunuðu hefði verið handtekinn við bankann og hinn heima hjá sér. Hann sagði að verið verið að skoða hvort krafist yrði áframhaldandi gæsluvarðhalds yfir mönnunum.

Málið er þó nokkuð flóknara en þetta því annar hinna grunuðu er talinn hafa hótað öðru fórnarlambi, sem tengist manninum sem sendur var í bankann, en lögregla hefur ekki viljað veita nánari upplýsingar um þetta.

Báðir hinna grunuðu eiga sér sögu ofbeldisbrota. Annar þeirra hlaut sextán ára óskilorðsbundið fangelsi árið 2000 fyrir að bana áttræðri konu í íbúð hennar við Espigerði. Í niðurstöðum geðheilbrigðisrannsóknar sem lagðar voru fram í málinu kom fram að maðurinn væri mjög hætturlegur undir áhrifum eiturlyfja og hefði verið í mikilli neyslu frá fimmtán ára aldri.

Hinn maðurinn var árið 2007 dæmdur í fjögurra ára fangelsi fyrir hrottafengnar líkamsárásir en hann í félagi við annann réðst á mann á Akureyri með grófu ofbeldi. Maðurinn var meðal annars dæmdur fyrir að klippa fingur vinstri handar af fórnarlambinu með greinaklippum. Þá var maðurinn í sama máli dæmdur fyrir grófa líkamsárás fyrir að ráðast á konu sem ók leigubíl og berja hana ítrekað í höfuðið.