Loka sorpbrennslunni að Svínafelli

Sorpbrennslustöðinni Brennu-Flosi hf að Svínafelli í Öræfum verður lokað. Ákvörðun um þetta var tekin á fundi bæjarráðs Sveitarfélagsins Hornafjarðar þann 21. febrúar, að höfðu samráði við rekstraraðila stöðvarinnar. Í tilkynningu frá Hjalta Þór Vignissyni, bæjarstjóra, segir að ástæða lokunarinnar sé umræða um sorpbrennslustöðvar á landinu og umræða um mengum sem af þeim stafar.

Sorpbrennslustöðin að Svínafelli hefur þjónað íbúum og fyrirtækjum í Öræfum frá árinu 1993 þegar Hofshreppur ásamt ábúendum í Svínafelli I ákváðu að hefja rekstur hennar. Hofshreppur sameinaðist öðrum sveitarfélögum í Austur-Skaftafellssýslu undir merkjum Sveitarfélagsins Hornafjarðar árið 1998.

 

Samhliða uppbyggingu brennsluofnsins byggði fjölskyldan í  Svínafelli I sundlaugina Flosalaug sem hituð var með orku frá brennsluofninum. Sundlaugin hefur þjónað gestum og íbúum Öræfa öll þessi ár og verið mikilvægur hlekkur í ferðaþjónustu.  Flosalaug verður nú einnig lokað.

 

Tekið verður upp samskonar fyrirkomulag í sorpmálum og annars staðar í sveitarfélaginu.  Stefnt er því að hið nýja kerfi taki gildi á allra næstu vikum.

 

„Það liggur fyrir að mælingar á mjólk í Svínafelli sýna að hún stenst fyllilega samanburð við aðra heilnæma mjólk sem framleidd er á Íslandi.  Mengunarmælingar á sorpbrennslunni fóru fram í janúar sl.  Umhverfisstofnun mun á næstu vikum taka sýni úr jarðvegi í námunda við sorpbrennslustöðina.  Niðurstöður þessara mælinga verða birtar þegar þær liggja fyrir,“ segir í tilkynningu Hjalta.