Sakar formann bæjarráðs um hroka

Sigurður Haraldsson, fulltrúi Framsóknarflokks í bæjaráði Árborgar, sakar Eyþór Arnalds, formann bæjarráðs og oddvita Sjálfstæðisflokksins, um hroka og hefur sagt sig úr starfshópi um framtíðarskipan sorpmála.

Helgi vísar í bókun Eyþórs Arnalds á fundi bæjarráðs 17. febrúar. Umræðuefnið var framlenging á sorphirðusamningi við sveitarfélagið. Sagði Eyþór að deilt væri um keisarans skegg í málinu. „Bæjarfulltrúar D-lista settu á fót þverpólitískan samráðshóp í sorpmálum, vera kann að það hafi verið misráðið ef samráðið verður til þess að hægja á málum," bókaði Eyþór á fundinum.

„Í bókun þessari tel ég koma fram þvílíkan hroka fulltrúa D-listans, Eyþórs Arnalds, í garð samstarfsfólks síns í bæjarstjórn Sveitarfélagsins Árborgar, að ég tel mig ekki geta unnið undir svona hótunum og tel því ráðlegast að segja mig úr samráðshópi um stefnumótun í sorphirðu.

Meirihluti D-listans getur þá einbeitt sér að því að gera hlutina eins og honum hentar og þarf ekki að dragnast með bæjarfulltrúa „sem hægir á málum"," bókaði Helgi á bæjarráðsfundi í síðustu viku.

Eggert Valur Guðmundsson, fulltrúi Samfylkingarinnar, sagðist á fundinum hafa skilning á afstöðu Helga. „Það er áhyggjuefni ef það sem fram kemur í bókun D-lista fulltrúanna er raunveruleg afstaða þeirra til samráðs og samvinnu allra bæjarfulltrúa um málefni sveitarfélagsins," bókaði Eggert sem kvaðst þó engu að síður, eftir umhugsun, ætla að starfa áfram með samráðshópnum. - gar